Entrega de premios: concurso de microrrelatos de medo

 

Para poñer fin á celebración do Samaín, entregamos os premios aos gañadores/as do concurso de microrrelatos de medo. Os participantes demostraron ter moito talento á hora de crear e conseguiron que tivésemos medo ao ler as súas composicións!

1º Premio: Laura Quiroga Rivas
2º Premio: Adolfo Pascual Romero Borja
3º Premio: Ayoub Rajouani

Moitos parabéns!

Erasmus Days no CIFP Porta da Auga

 

O pasado 11 de outubro celebramos no centro os Erasmus Days cunha actividade de difusión das oportunidades para a realización de mobilidades dentro dos proxectos Erasmus+ en marcha no centro, tanto para ciclos de formación frofesional básica e media, como para ciclos superiores.

Vocational training around Europe – Opportunities and experiences from CIFP Porta da Auga

Participación no programa NATURÉZATE-Plan Proxecta

No curso 22/23 que acaba de rematar, o alumnado dos Ciclos Formativos de Grao Básico en Servizos Administrativos e Mantemento de Vehículos participou en diversas actividades complementarias relacionadas co módulo de Ciencias Aplicadas.  Entre estas accións destacou a participación no programa Naturézate do Plan Proxecta, a través da súa liña “Voando no inverno”, asociada ao coñecemento das aves invernantes e dos ecosistemas húmidos costeiros que empregan para descansar e alimentarse.

 

O proxecto AVES E NATUREZA EN RIBADEO buscou achegar ao alumnado aos ecosistemas e espazos naturais protexidos da contorna, empregando as aves coma un recurso educativo que permite apreciar a gran diversidade de especies deste grupo faunístico e o papel que desenvolven nos ecosistemas.

 

 

 

 

 

O grupo das aves, a diferenza doutros coma insectos ou mamíferos, resulta un dos máis ricos en especies que poden ser relativamente doadas de observar de día con materiais sinxelos coma uns binoculares e un pouco de paciencia. Isto permite apreciar a riqueza de ecosistemas próximos e valorar a importancia da conservación destes e sentirse partícipes na toma de decisións neste sentido.

 

Traballamos en base a dúas actividades nas que participou alumnado de 1º e 2º cursos de Ciclo de Grao Básico en Servizos Administrativos e Mantemento de Vehículos.

  • A primeira das actividades consistiu na asistencia a unha charla e un obradoiro ofertados polo propio programa Naturézate. O alumnado asistiu na mesma xornada a unha charla titulada “Achegamento á biodiversidade galega”, na cal os estudantes puideron coñecer os principais espazos naturais e ecosistemas asociados da nosa comunidade, así como os principais grupos faunísticos e de flora.
  • A segunda delas consistiu nunha visita a un humidal protexido para a observación de aves acuáticas invernantes. O obxectivo era que o alumnado puidese estudar e comprender como funciona un ecosistema dunha ría-estuario e comprender a súa importancia coma lugar de alimentación e refuxio para moitas especies de aves residentes e migratorias. O humidal escollido pola súa facilidade de acceso e a diversidade de especies foi a Ría de Ribadeo, que percorrimos por ambas as beiras seguindo as aves que se ían desprazando coa marea. Aproveitamos o desprazamento para antes facer un pequeno percorrido pola costa de Ribadeo, enmarcada dentro do ZEC As Catedrais, onde tamén puidemos avistar diferentes especies de aves comúns e invernantes. O alumnado participante informouse previamente sobre os lugares a visitar e as aves que se poderían observar e entras as accións levadas a cabo están a elaboración dun tríptico para a visita e a realización de fichas de rexistro para as aves avistadas. Tamén subimos as citas das aves invernantes a través da plataforma internacional iBird.

Oferta Formativa para o Curso 2023/24

O documento que se presenta no enlace que hai a continuación recolle a oferta formativa que haberá dispoñible no CIFP Porta da Auga para o vindeiro curso 2023/24.

 

Para consultar a información relativa ao procedemento de admisión e matrícula para cada unha das ensinanzas, selecciona o enlace correspondente:

 

Calquera dúbida existente con respecto ao proceso, pódese poñer en contacto co centro educativo.

 

Mobilidades Erasmus+ de docentes

Nas derradeiras datas, algunhas das docentes do noso centro estiveron levando a cabo mobilidades Erasmus+ en Italia. Co obxectivo de ampliar a súa formación e desenvolvemento profesional, asi como participar na estratexia de internacionalización do centro, estiveron visitando diferentes centros educativos e empresas tanto nas zonas da Emilia Romana como en Sicilia.

Para saber máis sobre as mobilidades que se están a levar a cabo no noso centro, preme no seguinte enlace: Programas Internacionais

Oboradoiro de arte efémera e estampación con lixo mariño

Isa García (bióloga), integrante do colectivo artístico “Retoque Retro” foi a guía e relatora da actividade formativa “Obradoiro de Arte Efémera e Estampación con Lixo Mariño”, dirixido ao alumnado de 1º curso do Ciclo formativo de Atención a Persoas en Situación de Dependencia e do Ciclo formativo de Educación Infantil do CIFP Porta da Auga (Ribadeo).
Nesta formación o alumnado e profesorado adquiriron coñecementos e habilidades para realizar pezas de arte empregando só plástico e lixo procedente das praias.
O obxectivo desta actividade é concienciar ao alumnado e, por extensión a toda a comunidade sobre a importancia da reciclaxe, reutilización e redución dos residuos promovendo o desenvolvemento sostible e o coidado do medio ambiente.
Con Retoque Retro, o alumnado e profesorado realizou intervencións artísticas entre elas esculturas efémeras e prendas de roupa estampadas empregando residuos procedentes do mar.
Unha verdadeira actividade sensibilizadora sobre a problemática dos residuos plásticos nos océanos e mares da Terra e as súas consecuencias ambientais e sociais.